Kthimi i Princit Harry në Mbretërinë e Bashkuar për funeralin e gjyshit të tij, Princit Philip do të jetë një moment i rëndësishëm për një Familje Mbretërore të ndarë që ende ushqehet me plagë të thella mbi intervistën e tij dhe Meghanit që e dhanë pak kohë më parë për Oprah Winfrey.
Harry do të marrë pjesë në ngjarjen mortore në St George’s Chapel, Windsor, ka shumë të ngjarë javën e ardhshme, dhe megjithëse nuk ka pasur asnjë fjalë nëse Meghan, e cila është shtatzënë, do të bashkohet me të, besohet se nuk ka gjasa në këto rrethana.
Harry ka të ngjarë të bëjë udhëtimin për në Londër me aeroplan privat nga shtëpia e tij afër Los Angelesit dhe kuptohet që ai mund të lejohet të përdorë një përjashtim diplomatik për të hequr dorë nga rregullat normale të karantinës së COVID-19 që zbatohen për fluturimet nga ShBA-ja.
Ende nuk ka pasur një deklaratë zyrtare nga çifti për vdekjen e Philip.
Është raportuar se Harry ishte tashmë kryesisht i izoluar në rezidencën e tij prej 11 milionë dollarëve afër Santa Barbara që nga koha kur gjyshi i tij u shtri në spital.
Mendohet se ai do të testohet për COVID-19 para nisjes nga ShBA-ja dhe pas mbërritjes në Mbretërinë e Bashkuar, në vend që t’i nënshtrohet karantinës normale 10-ditore, megjithëse udhëtarët lejohen të largohen nga karantina nëse rezultojnë negativ pas pesë ditësh.
Nuk dihet se ku do të qëndrojë ai gjatë qëndrimit të tij në Mbretërinë e Bashkuar dhe as për sa kohë do të qëndrojë pas varrimit.
Ribashkimi i Dukës së Sussex-it me vëllain e tij, William dhe babanë e tij, Princin Charles do të jetë mjaft i vështirë pas akuzave tronditëse të tij dhe Meghanit për racizëm në intervistën e famshme, të shikuar nga miliona njerëz në mbarë botën muajin e kaluar.
Pavarësisht nga përçarja e dukshme, Mbretëresha do të presë që nipërit e saj të vendosin një front të bashkuar, së bashku me pjesën tjetër të mbretërorëve si një shenjë respekti për Dukën e ndjerë të Edinburgut.
Nëse uniteti do të provojë më shumë sesa një fasadë publike mbetet të shihet, por disa burime mbretërore shpresojnë që takimi i parë i vëllezërve për më shumë se një vit mund të çojë në një lloj pajtimi.
Nëse Meghan do të bashkohet me Harryn për varrimin, një afrim mbretëror konsiderohet më pak i mundshëm të ndodhë, veçanërisht pasi ajo i tha Oprah se Kate e ka bërë të qajë gjatë periudhës së saj para martesore.
Një burim i afërt me familjen i tha DailyMail sot: “Harry do të bëjë absolutisht të pamundurën që të kthehet në Mbretërinë e bashkuar dhe të jetë me familjen e tij”.
“Ai nuk do të dëshirojë asgjë më shumë sesa të jetë atje për familjen e tij, dhe veçanërisht gjyshen e tij, gjatë kësaj kohe të tmerrshme”.
“Meghan është padyshim shtatzënë kështu që do të duhet të marrë këshilla nga mjekët e saj nëse është e sigurt për të që të udhëtojë, por unë mendoj se Harry do të shkojë patjetër”.
Ndërsa Harry pretendoi në intervistë të ketë pasur gjithmonë një marrëdhënie të mirë me Mbretëreshën, është e paqartë se çfarë lloj marrëdhënie, nëse ka, ai tani ka me Princin William dhe babanë e tij, Princin Charles.
Sipas nikoqirit të CBS, Gayle King, një mik i ngushtë i Oprah, Princi William, 38 vjeç, u takua me Princin Harry pas intervistës shpërthyese, por bisedimet nuk ishin produktive.
Pretendimet e Harryt se William është ‘bllokuar’ brenda monarkisë besohet se kanë shkaktuar ofendim të thellë. Disa ekspertë mbretërorë besojnë se William është i gatshëm t’i japë vëllait të tij një shans të fundit.
Dyshja pothuajse me siguri do të ishin takuar gjithsesi më 1 korrik për zbulimin e një statuje të Princeshës Diana në Londër, por gjithmonë kishte një pikëpyetje mbi atë ribashkim për shkak të datës së afërt të lindjes për Meghan, e cila nuk është konfirmuar publikisht.
Nuk është e qartë nëse Harry kishte planifikuar të kthehej në qershor, kur Princi Philip do të kishte mbushur 100 vjeç.
Tani ngjarjet kanë detyruar William dhe Harry të takohen më shpejt sesa pritej, dhe anëtarët e tjerë të Familjes Mbretërore do të shpresojnë që një shërim i përçarjes së vëllezërve do të jetë në planet e tyre.
Çifti Sussexes nfritën akuza të forta gjatë intervistës së famshme, ku akuzuan një mbret pa emër, jo Mbretëreshën dhe as dukën, për ngritjen e shqetësimeve se sa e errët do të ishte toni i lëkurës së djalit të tyre, Archie para se ai të lindte – ku më pas Princi William hodhi poshtë këto pretendime duke thënë se Familje Mbretërore nuk është raciste.
Zonja King pretendoi më pas se dyshja kishte një plan të jashtëzakonshëm që nëse gjendja e Princ Phlip do të përkeqësohej, intervista nuk do të transmetohej. Kjo nuk është konfirmuar nga rrjetet televizive.
