Gjykata Themelore Penale Shkup, në pajtim me rekomandimet e Organizatës Botërore të Shëndetësisë, masat dhe protokollet e autoriteteve shëndetësore në vend për pengimin e virusit Kovid-19, si dhe Vendimit për veprim të gjykatave në kushte të rrezikut të rritur në kohë të pandemisë, sot e publikoi Protokollin për zbatimin e masave për mbrojtje nga Kovid-19.
Protokolli u përpunua nga Shoqata e gjykatësve të RMV dhe ka të bëjë me të gjithë të punësuarit (gjykatës, punonjës në gjykatë dhe administratë), si dhe të gjitha palëve (të akuzuar, avokatë, prokurorë dhe përfaqësues tjerë të organeve shtetërore), të cilët hyjnë në gjykatë.
“Protokolli ka për qëllim mbrojtjen e shëndetit të të punësuarve në gjykatë, por para së gjithash mbrojtjen e shëndetit të gjithë qytetarëve, të cilët kanë nevojë për realizim të së drejtës para gjykatës. Njëherit, protokolli në kuadër të të gjitha masave tjera, që i ka ndërmarrë Gjykata Penale nga shpallja e pandemisë e deri sot, siguron funksionalitet të gjykatës dhe respektim dinjitoz të të drejtave të garantuara kushtetuese dhe obligimeve të qytetarëve”, thuhet në njoftimin e lëshuar nga Gjykata penale.
