Në 24 orët e fundit në Dibër, janë regjistruar gjashtë persona të diagnostikuar me COVID-19. Në gjashtë ditët e kaluara, gjithsej 19 persona janë diagnostikuar me coronavirus.
“Unë paralajmërova se numri i rasteve të reja me COVID-19 do të rritet, që është pasojë e lirimit të masave dhe mosrespektimit të masave dhe protokolleve, si nga qytetarët, ashtu edhe nga subjektet afariste. Numri i të infektuarve është më i lartë në krahasim me fazën e parë kur kemi pasur 51 të infektuar”, tha kryetari Hekuran Duka.
Ai përsëri bëri thirrje për respektim të rreptë të masave, mbajtjen e maskës mbrojtëse, ruajtjen e higjienës personale, distancën fizike, shmangien e grupimeve dhe tubimeve, të cilat janë parakusht, tha ai, për të mbrojtur veten dhe të tjerët nga armiku i padukshëm.
Që nga fillimi i pandemisë, pra shfaqja e rastit të parë, më 26 shkurt, deri më tani numri i përgjithshëm i të infektuarve ka arritur 109 persona, tre prej tyre nga Qendra Zhupa.
