Gjashtë muaj pas zjarrit në spitalin modular të kovidit në Tetovë ku humbën jetën 14 persona, Prokuroria Publike informon se është duke u zhvilluar një fazë e analizës së të gjitha provave të mbledhura. Sipas informacioneve të tyre, ende duhet të punohet në zbardhjen e plotë të fakteve të rastit për të marrë vendim për përgjegjësi të mundshme penale. “Në rastin në vazhdimësi janë ndërmarrë veprimet në kuadër të procedurës para hetimore për konstatimin e të gjitha fakteve dhe rrethanave. Lidhur me këtë është urdhëruar ekspertiza nga MPB-Sektori për hetime dhe ekspertiza mjekoligjore teknike (SHEMT) i cili është publikuar menjëherë nga prokuroria dhe i cili i referohet shkaqeve të drejtpërdrejta të zjarrit. Janë urdhëruar dhe kryer edhe dy ekspertiza të tjera – nga Fakulteti Teknologjik dhe nga ekspertë – inxhinier elektrik”, thuhet në kumtesën e Prokurorisë Publike.
Në tetor të vitit 2021, Prokuroria njoftoi se sipas ekspertizës së MPB-së, zjarri në spitalin modular ka ardhur si pasojë e djegies së kabllos zgjatues, në të cilin është vendosur një aparat defibrilator-reanimues, një karikues celulari dhe një pajisje tjetër. Gjatë asaj periudhe, u kërkua ndihmë në hetim ng ekspertë dhe hetues nga Policia Federale Kriminale e Gjermanisë, raporti i të cilëve erdhi në janar të vitit 2022.
“Nga ekspertët gjermanë është kërkuar ndihma juridike eksperte ndërkombëtare, kurse raporti i marrë, lidhur me shkaqet e drejtpërdrejta të zjarrit, nuk ndryshon shumë nga sa është konstatuar nga ekspertët e MPB-së – Sektori për hetime dhe ekspertiza mjekoligjore teknike ( SHEMT). Megjithatë, të gjitha raportet analizohen në korrelacion me provat e tjera të marra, si dhe me deklaratat verbale të dëshmitarëve të dëgjuar dhe personave të tjerë që kanë dijeni për ngjarjen. Analiza e të gjitha provave të mbledhura është në vazhdim e sipër. Prokurorët publikë pas vërtetimit të plotë të fakteve në rastin do të marrin vendim për të cilin menjëherë do të njoftohet opinioni”, thuhet në njoftimin e Prokurorisë Publike. Zjarri në spitalin modular ndodhi më 8 shtator 2021, ku jetën e kanë humbur 14 persona. Pati gjithashtu një marshim civil në tetor duke kërkuar përgjegjësinë për tragjedinë.
