E ardhmja e tij duket se u mbyll para kohe. Një futbollist brazilian rrezikon deri në 10 vite burg, pasi përplasi për vdekje me makinën e tij një person.
Renan Victor da Silva, fitues i kupës së botës me kombëtaren U-17 të Brazilit, u përfshi në aksident në qytetin Braganca Paulista, Sao Paulo, ndërsa ishte i dehur dhe po lëvizte me makinën e tij në korsinë e gabuar.
Për shkak të alkoolit të tepërt, sipas policisë 20-vjeçarin e ka zënë gjumi në timon dhe është përplasur me një motoçiklist, i cili vdiq në vend. Lojtari, i cili luan për ekipin e Palmieres, nuk bëri rezistencë në momentin e arrestimit ndërsa shfaqej i turbullt dhe aspak i vetëdijshëm për çfarë kishte ndodhur.
Autoritetet theksuan se aksidenti nuk ka qenë i qëllimshëm, por rrethanat në të cilat është gjendur 20-vjeçari i rëndojnë akuzat ndaj tij. Policia gjeti një shishe alkooli në makinë, e po ashtu rezultoi se ai po lëvizte pa patentë, dhe për këtë arsye mund të dënohet me minimumi 10 vjet burg.
Menjëherë pas publikimit të ngjarjes, klubi i Palmieras njoftoi se ka ndërprerë kontratën me lojtarin, ndërsa shprehu trishtimin e thellë për ngjarjen e rëndë.
