Kristjan Leskaj është i riu shqiptar që është bërë së fundmi kryefjalë e mediave italiane. Ndonëse ka vetëm pak vite që jeton në Savona të Italisë, i riu shqiptar ka arritur të shkëlqejë me rezultate të larta në mësime. Në emisionin “Abc-ja e mëngjesit”, Kristjan tregoi se vitin e katërt dhe të pestin i ka bërë në një të vetëm pasi kishte rezultate të larta.
“Kur erdha këtu, muajin e parë dhe të dytë kisha pak vështirësi dhe u regjistrova në vitin e parë për gjuhën si dhe për të ecur pak me mësime. Në Dhjetor të atij viti kalova në vit të dytë dhe me më pas kam bërë vitin e tretë normalisht. Të katërtin dhe të pestin i kam bërë në një”, tregoi Kristjan.
Ai tregoi se ka patur një mbështetje të jashtëzakonshme dhe nga stafi i shkollës. “Me të gjithë kam patur raporte të mira ndërsa drejtoresha dinte dhe situatën. Kur pa dhe rezultatin është munduar të më gjejë një vend pune në Torino, ku do të vazhdoj universitetin. Jam pritur goxha mirë dhe ishin mahnitur sepse po bëja dy vite njëkohësisht dhe për shkak të rezultateve.”, tha i riu shqiptar.
