Zhvillimet në tabelën diplomatike të shahut të Lindjes së Mesme janë të ethshme me Rexhep Tajip Erdogan që i hedh benzinë zjarrit duke synuar Izraelin dhe vetë Benjamin Netanjahun për bombardimet në Gaza. Madje Ankaraja po tërheq ambasadorin e saj në Izrael dhe sekretari amerikan Anthony Blinken, po e vendos në programin e tij vizitën në Turqi si një emergjencë pas turit të dytë në Lindjen e Mesme.
Blinken do të vizitojë Turqinë të dielën për dy ditë, përpara takimeve të tij me ministrat e jashtëm arabë në Aman të Jordanisë dhe vizitës së tij në Izrael. Të hënën, Blinken do të takohet me homologun e tij turk Hakan Fidan. Për momentin mbetet e paqartë nëse kreu i Departamentit të Shtetit do të takohet me presidentin turk Rexhep Tajip Erdogan, megjithëse zyrtarët që e shoqërojnë e konsiderojnë të mundshme një mundësi të tillë.
Në këtë vizitë Blinken thuhet se do të diskutojë rëndësinë e mbrojtjes së jetës civile në Izrael dhe Rripin e Gazës, lehtësimin e dërgimit të ndihmës humanitare në Gaza dhe rifillimin e shërbimeve bazë atje. Ai do të diskutojë gjithashtu sigurinë euroatlantike, mbështetjen e vazhdueshme për Ukrainën dhe nevojën për të ruajtur unitetin e Aleancës së NATO-s, duke përfshirë ratifikimin e anëtarësimit të Suedisë në NATO. Njoftimi vjen menjëherë pasi presidenti turk tha se: Benjamin Netanyahu nuk është më bashkëbiseduesi ynë, ne e kemi fshirë atë.” dhe më pas ka tërhequr ambasadorin e Turqisë në Izrael për konsultime, pa e hequr nga objektivi i tij dhe SHBA-së.
