Kryeministri Edi Rama ka reaguar për heqjen e barrikadave në veri të Kosovës, ku për mbi dy javë u mbajtën të bllokuara disa rrugë kryesore që lidhin Prishtinën dhe Beogradin zyrtar, nga elementë të armatosur serbë.
Ai thotë se kjo formë proteste mori dhe bekimin e aleatëve perëndimorë, SHBA e BE, mirëpo qeveria shqiptare nuk është dakord fare në këtë pikë. Edi Rama e konsideron të gjithën një shfaqje që nuk prodhoi asgjë, përveç tensioneve të përkohshme.
“Asgjë e re, shfaqja zgjati ca më shumë, tensioni u ngrit ca më lart, fjalët u këmbyen me ca më shumë zjarr, manovrat ushtarake patën ca më shumë hov, po fundi qe po i njëjti dhe të gjithë u kthyen në shtëpi, sekush me fitoren e vet me vete si gjithmonë!
Ah po, diçka e padëgjuar ndodhi! Doli kuptimi i ri i barrikadës, e cila pas 434 vjetësh hyri në listën e mjeteve të protestës paqësore me bekimin e BE dhe të SHBA! Shpresojmë në mirëkuptimin e aleatëve tanë strategjikë për të mos qenë dakord në këtë pikë. Po fare!
Pyetja mbeti po ajo që ishte përpara këtyre barrikadave paqësore e deklaratave armiqësore! Dhe deri kur përgjigjet e ndryshme të nisen po njësoj nga e shkuara, pyetja do të mbetet po aty edhe pas shfaqjes së rradhës, kur barrikadat të thyejnë paqësisht monotoninë e hiçzgjidhjes”, shkruan kryeministri Edi Rama.
