Një futbollist 20-vjeçar nga Kosova ka vdekur të dielën në një aksident tragjik në Gjermani, njofton klubi i tij. VfL- Ulm 1905 Fußball – klubi nga liga amatore në Gjermani – njoftoi në Facebook se Jetëlir Hasani nga Prishtina humbi jetën në një aksident trafiku të dielën, raporton Gazeta Express.
Lajmi për vdekjen e tij është bërë i ditur edhe nga vetë familja Hasani.
“Dje u goditëm nga një lajm i trishtueshëm. Lojtari, miku dhe anëtari i klubit tonë, Jetëlir Hasani ka ndërruar jetë”, thuhet në njoftimin e klubit gjerman.
“Ne në VFL Ulm dëshirojmë t’i shprehim ngushëllime familjes Hasani në këtë kohë të vështirë”, thuhet tutje në njoftimin e VFL Ulm. Trupi i pajetë i 20-vjeçarit është sjellë në Prishtinë, ku do të varroset sot, njofton familja e viktimës.
“Me dhembje dhe pikëllim të thellë njoftojmë miqtë, shokët dhe dashamirët se pas një aksidenti tragjik në Gjermani, ndërroi jetë më i dashuri jonë: Jetëlir Hasani Varrimi i të ndjerit bëhet nesër më datë: 05.11.2020 (e Enjte) në ora 14:00 në varrezat e qytetit në Prishtinë, në Dragodan. Të pikëlluar: Familja Hasani”, thuhet në njoftimin e familjes.
