Muaj më parë, Ministri i Ekonomisë, Kreshnik Bekteshi, ka nënshkruar marrëveshje historike me Greqinë që do të garantojë diversifikimin dhe stabilitetin energjetik të vendit tonë dhe vendeve të Ballkanit Perëndimor.
Bekteshi dhe Ministri i Ambietit Jetësor dhe Energjisë të Republikës së Greqisë, Kostas Skrekas, me nënshkruajtën Marrëveshjen ndërmjet dy qeverive për zhvillimin e interkoneksionit për transmetimin e gazit natyror Greqi – Maqedoni e Veriut.
Me ndërtimin e interkonektorit mundësohet edhe një burim tjetër i gazit natyror për Maqedoninë e Veriut, respektivisht hapet mundësia për hyrjen e gazit natyror nga Azerbajxhani, Shtetet e Bashkuara, Katari dhe Turqia.
Këtë Projekt e ka mbështetur edhe Departamenti i Shtetit të SHBA-së, që dëshmon edhe njëherë se Maqedonia e Veriut krahas të gjitha sfidave mbetet pjesë e projekteve gjeostrategjike të partnerve strategjik, në këtë rast të SHBA-së.
Ky projekt do të sigurojë një furnizim të qëndrueshëm dhe të vazhdueshëm me gaz, pavarësi dhe çmime konkurruese, e cila është në përputhje me strategjinë afatgjate të energjisë.
Kjo lidhje e Maqedonisë së Veriut me Greqinë me ndihmën e SHBA-së dhe BE-së e bën vendin një koridor energjetik për vendet e Evropës juglindore për qasje alternative në burimet të konsiderueshme të energjisë.
Ndërtimi i interkonektorit me Greqinë është një projekt me vlerë mbi 100 milion euro, nga të cilat investimi nga Maqedonia e Veriut do të arrijë në 54 milion euro.
