Kryetarja aktuale e qytetit të Shkupit, Danela Arsovska, nuk do të kandidohet për një mandat të ri. Në një deklaratë për mediat, dhënë sot pas dorëzimit të gjashtë autobusëve të rinj ekologjikë për nevojat e NQP, Arsovska tha se situata në shtet është jashtëzakonisht e polarizuar dhe se nuk planifikon të bashkëpunojë me njerëz që dinë vetëm të sabotojnë dhe bllokojnë.
– Do doja që ata, të paktën një herë, të tregojnë dhe të dëshmojnë fillimisht para qytetarëve se ajo që thonë, do të mund ta realizojnë, për të pasur mbështetje në zgjedhjet e ardhshme. Kur unë kandidova për kryetare të qytetit, pata mbështetje nga VMRO-DPMNE, e cila, për fat të keq, nuk arriti ta tejkalojë veten. Shumë krenari për të lejuar dikë të punojë pa i thënë çfarë dhe si të bëjë. Faleminderit, por unë nuk do të dëshiroja të punoj më kurrë me njerëz që dinë vetëm të sabotojnë dhe të bllokojnë, tha Arsovska.
Kur u pyet nëse ngjarjet e fundit me NQP kanë filluar fushatën për zgjedhjet lokale, Arsovska tha se nuk do të futet në agjendat politike, por që qytetarët janë mjaftueshëm të zgjuar dhe do të mund të vlerësojnë ata që kanë mundur të zgjidhin problemin me transportin publik gjatë tri viteve të fundit.
– Nëse dikush thotë se do ta zgjidhë këtë problem vitin e ardhshëm pas zgjedhjeve lokale, pyeteni pse nuk e ka zgjidhur deri tani. Sepse Këshilli është ai që mund të kishte marrë vendimin për blerjen e autobusëve të rinj tre vjet më parë. Pse nuk është marrë një vendim i tillë, duhet t’i pyesni ata. Po të mund të funksiononte qyteti i Shkupit pa vendim të Këshillit dhe të mund të bëhej një tender publik, do të ishte bërë tashmë, tha Arsovska.
