Policia e Kosovës përmes raportit 24 orësh, ka dhënë detaje për sulmin e mbrëmshëm ndaj gazetarit Valon Syla.
Policia thotë se viktima ka pranuar tretman mjekësor ndërsa të dyshuarit janë larguar nga vendi i ngjarjes.
Në raport nuk bëhet e ditur nëse ka të arrestuar.
“LËNDIM I LEHTË TRUPOR, Rr. Ilir Durmishi, Prishtinë 11.04.2023 – 22:29. Viktima mashkull kosovar me profesion gazetar, ka raportuar se tre të dyshuar deri më tani të pa njohur e kanë sulmuar fizikisht me ç’rast i kanë shkaktuar lëndime të lehta trupore. Viktima ka pranuar tretman mjekësor, ndërsa të dyshuarit janë larguar nga vendi i ngjarjes me një veturë me targa vendore. Në vendin e ngjarjes kanë dalur njësitë relevante policore dhe prokurori i shtetit. Rasti në procedurë hetimore nga njësitë relevante policore”, thuhet në raport.
Çka dihet deri tani?
Gazetari Valon Syla rreth mesnatës është sulmuar nga disa persona në lagjen Bregu i Diellit në Prishtinë.
Syla pësoi lëndime në kokë dhe pas trajtimit mjekësor, nga QKUK-ja tha se sulmuesit ishin “tre islamikë fanatikë”.
“Po… sulmi, dmth… tre islamikë fanatikë më kanë sulmu”, tha Syla për RTV Dukagjini.
“Shpejt e shpejt ka ndodh dhe kanë ikë”, tha ai.
Syla paraprakisht ishte në emisionin Pressing në T7, ku është analist. Temë diskutimi ishte debati që ka shkaktuar nisja e gjykimit të ish-krerëve të UÇK-së në Gjykatën Speciale Hagë.
Gazeta Express mësoi se sulmuesit e ndoqën gazetarin Valon Syla nga objekti i T7 deri te lagjja Bregu i Diellit në Prishtinë, ku më pas e sulmuan.
