Republika Çeke e ka shpallur të shtunën, ditë zie kombëtare pasi një person i armatosur vrau 14 persona dhe plagosi 25 në një universitet në Pragë.
Presidenti Petr Pavel shprehu “trishtimin e tij të madh” dhe “zemërimin e pafuqishëm për humbjet krejtësisht të panevojshme” të jetëve.
Personi i armatosur, për të cilin policia tha se ishte “eliminuar”, besohet të ketë vrarë edhe babanë e tij dhe mund të jetë i lidhur me vdekjen e dy personave javën e kaluar.
Është një nga sulmet masive më të këqija në historinë e fundit evropiane.
Të shtënat filluan rreth orës 15:00 me orën lokale (14:00 GMT) të enjten në ndërtesën e Fakultetit të Arteve të Universitetit Charles në qendër të kryeqytetit çek.
Personi i armatosur hapi zjarr në korridoret dhe klasat e ndërtesës, duke vrarë në mënyrë të rastësishme, ndërsa personeli dhe studentët përdorën mobilje për t’u mbyllur në dhoma.
Pamjet dramatike të shpërndara në mediat sociale tregojnë njerëz që hidhen për të shpëtuar nga një parvaz jashtë disa kate lart. Dëgjohen edhe të shtëna armësh.
Policia thotë se i armatosuri ishte një student 24-vjeçar në universitet dhe nuk kishte precedentë të mëparshëm penalë, megjithëse shton se u gjet një “arsenal i madh armësh dhe municionesh”.
Para të shtënave, policia kishte marrë një raport se i dyshuari besohej se po shkonte në Pragë nga një qytet aty pranë me qëllimin për të vrarë veten.
Pak kohë më vonë, edhe babai i burrit u zbulua i vdekur.
