Zëvendëskryeministri për Çështje Ekonomike, Fatmir Bytyqi në një prononcim për TV21 komentoi deklaratat e sotme të ish-sekretarit të përgjithshëm të Qeverisë, Muhamed Zekiri. Sipas Bytyqit, është e vërtetë se Qeveria ka sjellë konkluzion për realizimin e studim fizibilitetit për Postën e Maqedonisë dhe Hekurudhat, ndërsa Zekiri ka qenë një prej të përzgjedhurve për ndjekjen e situatës. Megjithatë Bytyqi shton se në konkluzion nuk përmendet procedura dhe modaliteti i implementimit.
“Është e vërtetë se ka patur konkluzion në Qeveri që të kryhet studim fizibiliteti për Postën dhe Hekurudhat – Transport. Konkluzioni mbanë vetëm këtë. Ka qenë i propozuar si një prej personave të caktuar nga Qeveria për të ndjekur situatën në Postë dhe Hekurudhë. Ka qenë i propozuar prej meje dhe këtu mbaron çdo konkluzion i qeverisë dhe pastaj shkon zbatimi. Nuk shoh asgjë kontradiktore në deklaratën e sekretarit të mëparshëm të qeverisë. Ne në Qeveri asnjëherë nuk diskutohet një gjë e tillë. Ne zakonisht kemi shumë pika të tilla ka konkluzione të ndryshme, asnjëherë nuk flitet për modalitetet e implementimit për çfarëdo që të jetë konkluzioni”, deklaroi Bytyqi në linjë telefonike për TV21, duke na dërguar dokumentin e konkluzionit.
