Ish-ministri i Ekonomisë Kreshnik Bekteshi ka konfirmuar se ndaj tij është ngritur një kallëzim penal për një vepër të lidhur me zhvillimin e zgjedhjeve që u mbajtën në maj të këtij viti. Kjo vjen pasi në buletinin e Ministrisë së Punëve të Brendshme u publikua një njoftim që SPB Ohër ka ngritur një kallëzim penal kundër K.B. (39) nga Kërçova, pa specifikuar për kë bëhet fjalë.
Sipas ministrisë, Bekteshi dyshohet për kryerjen e veprës penale “pengim i drejtësisë”.
“Më 07.05.2024, i raportuari nga telefoni i tij celular përmes një aplikacioni mobil ka dërguar një mesazh te kryeshefi i policisë në SPB Ohër, duke komentuar marrjen e masave ligjore policore dhe veprimeve hetimore lidhur me një vepër penale sipas nenit 149 të Kodit Penal dhe nenit 190, paragrafi 2 të Kodit Zgjedhor,” thuhet në buletinin e MPB-së.
Sot, Bekteshi e publikoi mesazhin që i kishte dërguar kryeshefit të policisë, si dhe kontekstin pse ishte dërguar.
“Më 7 maj, në cilësinë e koordinatorit të ‘Frontit Evropian’ në Njësinë Zgjedhore 5, mora informacion nga shtabi në Ohër se në ditën e heshtjes zgjedhore, shefi i shtabit dhe anëtarët e shtabit u kontrolluan nga SPB Ohër, gjë që përbën një ndërhyrje të drejtpërdrejtë në procesin zgjedhor. Duke pasur parasysh se detyra e kreut të sektorit është të sigurojë zgjedhje të drejta dhe demokratike, më poshtë është mesazhi që kam dërguar si një person që ka përgjegjësi për procesin zgjedhor,” tha Bekteshi duke publikuar mesazhin me përmbajtje:
“Çdo respekt për ju. Jeni të fortë. Duhet t’ju vijë turp që merreni me të rinjtë,” shkruhej në mesazhin e dërguar më 7 maj.
Akuzat ndaj Bekteshit nga partia e tij, BDI, i kanë cilësuar si të pabaza dhe kanë thënë se ato kanë për qëllim diskreditimin e partisë dhe përfaqësuesve të saj. Nga VMRO-DPMNE kanë thënë se është mirë që Bekteshi pranoi se ka bërë presion dhe kanë kërkuar që prokuroria dhe gjyqësori të veprojnë.
