Zëdhënësi i Bashkimit Evropian, Peter Stano, u ka bërë thirrje autoriteteve në Prishtinë që të mundësojnë që serbët në Kosovë të votojnë më 16 janar në referendumin për ndryshime kushtetuese, duke theksuar se të gjithë qytetarët kanë të drejtën demokratike për të votuar në zgjedhje dhe procese të tjera zgjedhore.
“Me keqardhje konstatojmë se autoritetet e Kosovës nuk lejuan organizimin e votimit për referendumin, tha Stano, duke u kërkuar autoriteteve të Prishtinës që të zbatojnë “praktikën aktuale të votimit të OSBE-së”.
Stano për Tanjugun serb ka njoftuar po ashtu se shefi i diplomacisë së BE-së, Joseph Borrell, ka biseduar mbrëmë në telefon me presidentin e Serbisë, Aleksandar Vuçiq, e më pas edhe me kryeministrin e Kosovës, Albin Kurti rreth kësaj çështje.
“Borrell përsëriti qëndrimin e BE-së se çdo serb në Kosovë duhet të ketë mundësinë për të hedhur votën e tij përmes procesit të grumbullimit të votave, të organizuar nga OSBE,” tha Stano.
Stano u bëri thirrje palëve të gjejnë një zgjidhje të pranueshme reciprokisht që do t’u mundësonte votuesve që jetojnë në Kosovë të ushtrojnë të drejtën e tyre demokratike.
Rreth bisedës me Kurtin për çështjen e referendumit ka shkruar sot edhe kreu i Politikës së Jashtme të Bashkimit Evropian, spanjolli Josep Borell.
Borell ka shkruar se njerëzve duhet t’iu lejohet ushtrimi i të drejtës së tyre për votë, derisa përmend se në të kaluarën ka qenë misioni i OSBE-së ai që është marrë me ndërmjetësimin e grumbullimit të votave.
Spoke to @albinkurti & @predsednikrs yesterday regarding the collection of votes in Kosovo for Sunday’s constitutional referendum in Serbia.
Collection of votes in the past has taken place through facilitation of the @OSCE. People should be able to exercise their right to vote.— Josep Borrell Fontelles (@JosepBorrellF) January 13, 2022
“Njerëzit duhet të jenë në gjendje të ushtrojnë të drejtën e tyre për të votuar”, ka shkruar ndër të tjera Borrell duke njoftuar për bisedën që ka zhvilluar me kryeministrin Kurti.
Në anën tjetër, kryeministri Kurti ka ripërsëritur se serbët në Kosovë me shtetësi të dyfishtë mund të votojnë në referendumin e Serbisë nëpërmjet postës apo në Zyrën ndërlidhëse në Prishtinë.
“Në një telefonatë me Përfaqësuesin e Lartë të BE-së, Josep Borrell, ia përcolla qëndrimin tonë: Serbët në Kosovë të cilët kanë shtetësi të dyfishtë mund të votojnë në referendumin e Serbisë nëpërmjet postës apo në Zyrën ndërlidhëse në Prishtinë. Një referendum në territorin sovran të një shteti tjetër nuk është praktikë e pranuar në asnjë vend demokratik”, ka shkruar Kurti në Twitter.
On a call w/ EUHR @JosepBorrellF, conveyed our stance: Serbs in Kosova w/ dual citizenship can vote in Serbia’s referendum by mail or in the liaison office in Prishtina. A referendum in the sovereign territory of another state is not a practice accepted by any democratic country. pic.twitter.com/xNza0pCUex
— Albin Kurti (@albinkurti) January 12, 2022
Qytetarët e Serbisë, më 16 janar, do të deklarohen në referendumin: “A jeni për konfirmimin e aktit për ndryshimin e Kushtetutës së Republikës së Serbisë?”.
