Shkollat nuk duhet të obligojnë nxënësit që të paguajnë për marrjen e dëftesave, thonë nga Zyra e Avokatit të Popullit, duke theksuar se sipas Ligjit për arsimin fillor dhe Ligjit për arsimin e mesëm, çdo fëmijë ka të drejtë të arsimimin fillor falas. E njëjta e drejtë, siç thonë nga Avokati i Popullit, vlen edhe për arsimin e mesëm, i cili është i detyrueshëm për çdo qytetar.
“Duke pasur parasysh që viti shkollor ka mbaruar, dhe nxënësve duhet t’u jepen dëftesat, të cilat nga ana e tyre janë dokumentacion i nevojshëm për regjistrim, pra arsimim i vazhdueshëm, Avokati i Popullit informon shkollat se dëftesat janë dokument publik i lëshuar në një kopje për nxënësit dhe për lëshimin e të njëjtës nuk duhet të kushtëzojnë nxënësit, përkatësisht prindërit-kujdestarët me pagesa paraprake të mjeteve të caktuara”, thuhet në njoftimin e Avokatit të Popullit.
Në këtë kontekst, Avokati i Popullit inkurajon nxënësit, përkatësisht prindërit-kujdestarët e tyre që raste të tilla mbledhjesh të cilat janë kryer kundër ligjit të paraqitën në Inspektoratin Shtetëror të Arsimit ose Avokatin e Popullit.
Në të njëjtën kohë, ai i bën apel këtij organi që kontrollon punën e shkollave dhe ushtrimin e të drejtave në fushën e arsimit që të përgjigjen në mënyrë të duhur për të parandaluar pagesa të tilla të paligjshme dhe t’i sanksionojë ato.
