Javën e ardhshme Aleanca për Shqiptarët do të marrë vendim për largim nga qeveria, mëson Veçer.mk, nga burime brenda Aleancë dhe koalicionin qeverisës.
Njëkohësisht do të kërkojnë që të kenë një anëtar në KSHZ, formalisht si parti opozitare.
Arben Taravari në këtë vendim do ta mbështesin 5 nga 8 deputetët e ASH-së.
Tre deputetët e tjerë ka gjasa të ngelin si pjesë e pushteti ose të veprojnë si të pavarur, por gjithsesi proqeveritarë, thonë burimet e lartëpërmendura. Në këtë grup mbetet Ziadin Sela, Elmi Azirin dhe Ilire Dautin.
Shumica e qeverisë në këtë situatë do të mbijetojë. Përveç tre deputetëve të ASH, shumica qeverisëse mbështetje do të ketë edhe deputeti Basri Bajrami dhe deputeti Husni Ismaili.
E gjithë kjo, sipas burimeve të cituara, është e koordinuar nga BDI dhe LSDM.
Gjegjësisht, burime partiake theksojnë se me shkëputjen e 5 deputetëve të Aleancës në opozitë, do të pengohet euforia e mundshme e mbështetjes së votuesve të ASH për koalicionin opozitar “Lidhja Evropiane për Ndryshim”, të përbëra nga Lëvizja BESA, LD dhe Alternativa të cilat nënshkruan marrëveshje për koalicionim në zgjedhjet e ardhshme parlamentare.
Sipas të gjitha sondazheve, ky koalicion opozitar, pra, “Lidhja Evropiane për Ndryshim” do të fitojë më shumë vota se BDI në zgjedhjet e majit 2024.
Ata tani, sipas sondazheve, janë të barabartë. Për Lidhjen Evropiane për Ndryshim do të votonin 5,1 për qind, ndërsa për BDI-në do të votonin 5,3 për qind, sipas rezultateve të Institutit për Hulumtime Politike dhe Qeverisje të Mirë nga Shkupi për muajin nëntor 2023. Shifrat ishin të ngjashme edhe në tetor 2023, të cilat shënojnë rritje të vazhdueshme në favor të LEN kundrejt BDI-së e cila ka rënie.
Prandaj nuk habitemi nga tentativat e qeverisë për inskenim dhe inxhinierimi i skenareve të këtëilla, me të cilën Arben Taravari duhet të vendoset si lider i fortë i ASH-së dhe pastaj pas zgjedhjeve të jetë sërish në dispozicion për të bërë koalicion me LSDM-në dhe BDI-në (për ndonjë pronë në Shkup). Aktualisht, 4.5% e votuesve do të votonin për ASH-në.
Taravari në mesin e nëntorit 2023, (jo)drejtpërdrejt njoftoi se çfarë duhet të ndodhë këtë javë.
Më 14.11.2023 ai tha se vendimi fundit i kryesisë së ASH-së është që në zgjedhjet e ardhshme të shkojnë e vetme, në përgjigjen e pyetjes së gazetarit rreth ofertës së Ali Ahmetit që ASH dhe BDI të kandidojnë me lista të përbashkëta në zgjedhjet e ardhshme.
– Tani për tani, vendimi i fundit i kryesisë së partisë është të shkojmë vet si subjekt në zgjedhje. Por, ky vendim duhet të kalojë edhe në kuvendin qendror që do të mbahet deri në fund të këtij viti, diku në dhjetor. Definitivisht, Aleanca për Shqiptarët nuk do të shkojë me BDI-në me lista të përbashkëta dhe këtë ia kam përsëritur edhe në takimin e fundit Ahmetit. Ne po përgatitemi për një performancë të pavarur dhe po mobilizojmë anëtarësinë. Ky është qëndrimi im dhe i kryesisë dhe nëse do të ndryshojë do të bëhet e qartë pas mbledhjes së organit më të lartë të partisë, ka thënë Taravari.
LSDM-ja dhe BDI-ja me lista të përbashkëta ose veç e veç – sigurisht që humbin
Këta, nga ana e tyre, LSDM dhe BDI po mendojnë të shkojnë me lista të përbashkëta në zgjedhjet e majit 2024.
Talat Xhaferi nga BDI do të jetë kryeministër para zgjedhjeve, kurse koordinatori i LSDM-së, Jovan Mitreski, kryetari i ri i Kuvendit, është opsioni më i mundshëm për qeverinë teknike, thanë dje nga “360 gradë”.
Kanal 5 ka marrë konfirmimin nga burime në LSDM se ky propozim është hedhur në tavolinë, nga ana e tyre në takimin e fundit me BDI-në, por ende nuk kanë marrë përgjigje për ofertën nga atje.
Argumentet e LSDM-së janë se me një zgjidhje të tillë do të arrihej një ekuilibër në shpërndarjen e funksioneve kryesore në qeveri, BDI nuk do të kishte kryeministër dhe kryetar parlamenti në të njëjtën kohë dhe në rast se kreu i shtetit nuk zgjidhet, ushtrues detyre presidenti do të ishte një maqedonas etnik.
Në takimin e fundit të partnerëve të koalicionit, sipas informacioneve të Kanal 5, LSDM ka dalë me një ofertë për lista të përbashkëta në zgjedhjet parlamentare, por ende nuk kanë marrë përgjigje nga Ahmeti.
Çfarë thonë sondazhet për LSDM-në?
Për cilën parti do të votonit nëse javën e ardhshme do të kishte zgjedhje parlamentare? Në këtë pyetje, sipas anketës së Institutit për Hulumtime Politike (IPIS), 20,3 për qind e atyre që janë përgjigjur se do të votojnë për VMRO-DPMNE-në, 11,3 për qind për LSDM-në.
Nëse zgjedhjet parlamentare do të mbaheshin javën e ardhshme, fituese do të ishte VMRO-DPMNE, sipas anketës së nëntorit të Institutit për Hulumtime për Politikë dhe Qeverisje të Mirë – Shkup.
