Sërish të rreme kanë rezultuar alarmet e sotme për “bomba” në 30 shkollat e Shkupit – ka njoftuar MPB-ja, sic percjell KlanM, pas masave të ndërmarra nga ekipet anti-terroriste në terren.
Ministri i Arsimit, Jeton Shaqiri, njofton se dikasteri që drejtohet nga ai së bashku me institucionet e tjera po analizojnë raportimet masive për bomba në shkolla njëkohësisht edhe problemet me platformën e mësimdhënies online për të dhënë rekomandime të reja. Sipas Shaqirit, sic njofton KlanM, një vendim i tillë që nxënësit të mësojnë onlinë është vështirë të merret.
“Prandaj them se vendimi për mësim të plotë online nuk është i lehtë për momentin pasi nuk dihet se çfarë pasojash do të ketë në qytetet e tjera dhe në shkollat e tjera fillore. Nëse ky është qëllimi i atyre që raportojnë bombat, nuk mendoj se do të merret kaq lehtë një vendim i tillë” – deklaroi Jeton Shaqiri
Matura shtetërore do të mbahet, siguron Ministri Shaqiri duke potencuar se nga aspekti i sigurisë është formuar grup pune që shqyrton të gjitha hapat që për shkak të alarmeve për “bomba”, të mos cënohet provimi i maturës.
“Sa i përket maturës shtetërore, Qendra e Provimeve Shtetërore ndërmerr të gjitha hapat e tjerë për organizimin e suksesshëm të provimit të maturës shtetërore. Matura do të organizohet” – deklaroi Shaqiri.
Kanë reaguar nga VMRO-DPMNE-ja. Sipas tyre, sic percjell KlanM, arsimi është në kolaps kurse fëmijët paguajnë çmimin e paaftësisë së Qeverisë. Kërkojnë që shkollat të sigurohen kurse të kompensohen orët e humbura mësimore.
“Ftojmë MPB-në ta bëjë punën dhe 24 orë t`i sigurojë shkollat dhe të mos fshehen me deklarata se jemi në luftë hibride. Ftojmë MASH-in urgjentisht të gjejnë mënyra, që derisa ka edhe pak kohë, të kompenzohen orët e humbura” – tha Vesna Janevska, VMRO-DPMNE.
