Nga një aksident trafiku që ka ndodhur pasditen e sotme, në afërsi të pikës kufitare Qafë Thanë, në kufirin shqiptaro-maqedonas, kanë mbetur të lënduar dy banorë të Strugës. Aksidenti ka ndodhur në rrugën Qafë Thanë -Pogradec, në afërsi të fshatit Piskupat.
Në aksident trafiku janë përfshirë vetura “Mercedes” e drejtuar nga V.A.(48), banuese në Strugë-Maqedoni dhe vetura “Golf” e drejtuar nga shtetasi shqiptar D.S.(22). Dy drejtuesit e mjeteve dhe S.A.(46), banues në Strugë, pasagjer në mjetin “Mercedes”, kanë marrë lëndime, njofton agjencia e lajmeve “Balkan Web”.
Të plagosurit janë trajtuar në spitalin e Pogradecit, ku ndodhen nën kujdesin e plotë të mjekëve dhe jashtë rrezikut për jetën. Një grup hetimor ndodhet në vendngjarje dhe sipas informacioneve fillestare shkak i aksidentit është bërë shpejtësia e papërshtatshme e lëvizjes sipas kushteve të rrugës.
