“Arrest me burg” vendosi sot Gjykata e Krujës për arrestimin e djalit të deputetit Rrahman Rraja, Rexhep Rraja, nën akuzën e dhunës ndaj Xhisiela Malokut.
Ai u arrestua gjatë ditës së dielë pasi prokuroria radhit akt-ekspertimin ku duken shenjat e dhunës ndaj vajzës, sikurse shenja të djegies nga cigarja, por edhe përgjimin ambiental mes vajzës dhe Rexhep Rrajës, një përgjim i kryer në ambientet organit të akuzës në datën 29 shtator.
Duke iu referuar tërheqjes nga kallzimi, prokuroria thotë se në dëshminë e parë, ku denoncohet dhuna në komisariatin 3, më pas edhe tek oficeri Emiliano Nuhu, ka përputhje me provat e mbledhura gjatë veprimeve hetimore.
Të tilla janë shenjat në trup, fakti që vajza shfaqet në kamera në hotelin ku ajo tregon se kishte qenë me ish të dashurin, një mesazh i dërguar nga shoqja e saj, për të cilin 25-vjeçarja tregon se ishte bërë shkaku pse ish i dashuri e kishte dhunuar.
Ndërsa ditën e djeshme në media Xhisiela Maloku refuzoi se ndaj saj është ushtruar dhunë.
