Tre persona nga Shkupi janë akuzuar për një akt mizor ndaj qenit endacak Felix, i cili ka përfunduar tragjikisht. Ngjarja ka ndodhur më 19 nëntor 2024 në zonën e Momin Potok, ku të dyshuarit kanë përdorur një shufër metalike për të rrahur qenushin, me arsyetimin se kishte kryer nevojën pranë një magazine.
Pas ngjarjes, Felix iu nënshtrua një trajtimi të gjatë mjekësor në ndërmarrjen publike “Lajka”, por nuk arriti të mbijetojë. Ai ndërroi jetë më 8 janar 2025, duke i dhënë fund vuajtjeve të tij të shkaktuara nga plagët e rënda në kokë.
Ministria e Punëve të Brendshme ka ngritur padi penale kundër:
Lj.K. (61 vjeç)
B.B. (64 vjeç)
Z.D. (74 vjeç)
Ata akuzohen për shkeljen e nenit 233 të Kodit Penal, që ndëshkon “keqtrajtimin e kafshëve”.
Rasti tashmë është dorëzuar në Prokurorinë Themelore Publike në Shkup për procedim të mëtejshëm. Ngjarja ka shkaktuar indinjatë të madhe në opinionin publik, duke ngritur thirrje për drejtësi dhe ndëshkim të rreptë për autorët.
