Përmes një njoftimi, Ministria për Politikë Sociale, Demografi dhe Rini informoi se ministri Fatmir Limani, së bashku me kryetarin e Komunës së Tetovës, Bilall Kasami, sot kanë vizituar objektin e ri “Rilindja” pranë institucionit publik “Rinia” në Komunën e Tetovës, për të inspektuar aktivitetet para hapjes së tij.
Kjo është vizita e dytë e ministrit në këtë kopsht, pa ftesë për mediat. Në muajin nëntor, ai ishte atje për të dorëzuar vendimet për punësim.
Në njoftim thuhet se kopshti është plotësisht i përfunduar dhe së shpejti fëmijët nga kjo zonë do të kenë mundësinë të kalojnë ditët e tyre të fëmijërisë aty.
Hapja e këtij kopshti do të mundësojë përfshirjen e 165 fëmijëve të moshës deri në 6 vjeç në procesin parashkollor.
Ndërtimi është financuar përmes Programit Vjetor të Veprimit “Mbështetja e BE-së për Arsimin, Punësimin dhe Politikën Sociale” për vitin 2017, me një buxhet të përgjithshëm prej rreth 805,000 €, nga të cilat Bashkimi Evropian ka financuar rreth 705,000 €, ndërsa shteti ka siguruar bashkëfinancim nga buxheti kombëtar prej rreth 100,000 €.
Për funksionimin normal të saj, janë siguruar edhe 29 vende të reja pune.
