Boksieri legjendar Mike Tyson (58 vjeç) pas një pauze prej 20 vitesh u rikthye në boksin profesionist dhe humbi kundër Jake Paul, i cili është 31 vjet më i ri. YouTuberi i njohur e mundi Tysonin e famshëm me vendim unanim të gjyqtarëve.
Në stadiumin “AT&T” në Arlington ishin mbi 80,000 spektatorë që shijuan tetë raunde me nga dy minuta secili. Në fund, gjyqtarët vendosën njëzëri që boksieri shumë më i ri ishte fituesi, duke e mposhtur me pikët 80:72, 79:73 dhe 79:73.
Në dy raundet e para, Tyson tregoi se ende kishte njohuri dhe teknikë për t’i bërë ballë rivalit shumë më të ri. Megjithatë, me kalimin e kohës, pritej që Paul të dominonte, sidomos duke e sfiduar kundërshtarin në aspektin e kondicionit. Paul dominoi veçanërisht në raundin e pestë dhe të gjashtë, por Tyson arriti t’u bënte ballë të gjitha sulmeve deri në raundin e fundit.
