Qeveritë e Irlandës dhe Norvegjisë do të shpallin sot vendimin e tyre për njohjen e shtetit palestinez, shkruajnë mediat në ato vende.
Dublini tregoi javën e kaluar se “me siguri” do të njihte një shtet palestinez përpara fundit të majit dhe Oslo la të kuptohet për një nismë të ngjashme në pranverë.
Udhëheqësit e dy vendeve, përfshirë kryeministrat e tyre Simon Harris dhe Jonas Gahra Store, do të mbajnë konferenca shtypi këtë mëngjes në Irlandë dhe Norvegji.
Me atë rast, Irlanda dhe Norvegjia duhet të shpallin vendimin e tyre për këtë, njoftuan mediat irlandeze RTE dhe Irish Times dhe mediat norvegjeze NRK dhe Aftenposten.
Ministria e Jashtme e Izraelit publikoi një video-mesazh për Dublinin në rrjetin social X për të paralajmëruar faktin se “njohja e një shteti palestinez rrezikon t’ju shndërrojë në një peng në duart e Iranit dhe lëvizjes islamike palestineze Hamas”.
Kjo masë “vetëm do të ushqejë ekstremizmin dhe paqëndrueshmërinë”, sipas diplomacisë izraelite.
Kryeministri spanjoll Pedro Sánchez njoftoi javën e kaluar se do të shpallë të mërkurën datën kur Madridi do të njohë shtetin palestinez.
Në mars, Sanchez lëshoi një deklaratë të përbashkët në Bruksel me krerët e qeverive të Irlandës, Sllovenisë dhe Maltës, në të cilën të katër vendet shprehën dëshirën e tyre për të njohur një shtet të tillë.
Për Izraelin, këto plane përfaqësojnë një “shpërblim për terrorizmin” që do të bënte më pak të mundshme një zgjidhje të negociuar për luftën në Rripin e Gazës.
Shumica e 193 vendeve anëtare të OKB-së – 142, sipas Autoritetit Palestinez – e kanë njohur deri më tani shtetin palestinez.
