Paga më të larta, kushte më të mira jetese dhe pune, karrierë, mundësi më të mira për fëmijë, janë vetëm disa nga arsyet pse çdo i treti në Maqedoni mendon të largohet nga vendi, sipas sondazhit të fundit të opinionit publik të kryer nga Instituti për Hulumtime Politikë në Shkup.
Sipas tij, 32.3% e të anketuarve kanë thënë se po mendojnë ose kanë menduar ndonjëherë të largohen nga vendi, ndërsa 63.6% nuk kanë menduar për këtë temë.
Ndonëse diferencat nuk janë të mëdha, është për t’u habitur që emigracionin mendojnë më së shumti personat e moshës 40 deri në 49 vjeç, ku 42.5% thanë se kishin apo kanë ende plane për t’u larguar nga vendi.
Shifra të ngjashme prej 42.2% të qytetarëve që mendojnë të largohen janë edhe në grupmoshën 30-39 vjeç, ndërsa ndër më të rinjtë, ata nën 30 vjeç, 37.8% kanë menduar ose po mendojnë të largohen nga vendi.
Krahasimi me anketat e viteve të kaluara nuk tregon ndonjë ndryshim të theksuar në qëndrimet e qytetarëve.
