Një numër i madh i të rinjve nga Maqedonia tashmë janë larguar për punë sezonale në Kroaci. Kamerierë, banakierë, kuzhinierë, shitës, shërbyese, higjenist, magaziniere në tregje më të mëdha, janë pozicionet më të zakonshme të punës që u ofrohen njerëzve nga bregdeti, por edhe në qytetet në brendësi të Kroacisë.
Prej disa vitesh ka një tendencë për të kaluar një verë pune në Kroaci dhe çdo vit gjithnjë e më shumë të rinj nga Maqedonia i bëjnë valixhet.
Akomodimi i siguruar, ushqimet e ngrohta, si dhe një pagë që vështirë se mund të fitohet në vendin tonë, por edhe për të kaluar periudhën e verës buzë detit, financiarisht i pavarur nga prindërit, është ajo që më së shumti tregojnë si arsyen kryesore të largimit për në punë sezonale.
Një numër i madh i të rinjve janë nisur drejt destinacioneve të tyre të punës tashmë në fillim të muajit mars, ndërsa numri më i madh i punëtorëve pritet të mbërrijë në Kroaci në maj dhe qershor, kur sezoni tashmë fillon me ritëm të plotë.
Sipas përvojave të bashkëbiseduesve tanë që kanë punuar në bregdetin kroat vitet e fundit, pagat e tyre varionin nga mbi 1000 euro për kamerierë, shërbyese, shitëse, higjeniste, asistente kuzhine, deri në mbi 2000 euro për shefat e kuzhinës në restorante.
Këtë vit, sipas kontratave me kompanitë që i kanë punësuar, rritja e pagave ka qenë e dukshme.
– Nga 1300 euro e lart, në varësi të pozicionit të punës. Shitësve, shërbyeseve dhe recepsionistëve u ofrohet kjo shumë, plus akomodimi dhe ushqimi. Pagat e kamerierëve këtë vit do të jenë rreth 1400 euro, ndërsa më të paguarit janë shefat e kuzhinës në restorante. Deri vitin e kaluar shumica e kuzhinierëve merrnin rreth 2000 euro në muaj, po ashtu pritet të marrin rrogë këtë sezon – thonë bashkëbiseduesit tanë që po përgatiten të shkojnë në punë në Kroaci.
Ata shtojnë se kur pagës i shtohen edhe shpenzimet e ushqimit dhe akomodimit, të cilat i paguan punëdhënësi, shuma është pak më pak se 2000 euro dhe ato para në Maqedoni nuk kanë mundur t’i fitojnë për një muaj, pavarësisht nëse do të punonin si kamerierë, shërbyese, shitëse…
Sipas të dhënave të Shërbimit Kroat të Punësimit (CES), në periudhën nga fillimi i vitit 2023 deri në fund të nëntorit janë dhënë 147.593 opinione pozitive për vendbanimin dhe punën e punëtorëve të huaj.
Interesimi më i madh ka për të punuar në hoteleri dhe gastronomi, dhe përveç një numri të madh studentësh dhe të rinjsh nga vendi, gjithnjë e më shumë po largohen familje të tëra që qëndrojnë deri në fund të sezonit, pra deri në tetor.
