Rrotullimi i Tokës është konstant – por a e dini se boshti mbi të cilin ne rrotullohemi ka ndryshuar ndjeshëm gjatë 30 viteve të fundit?
Shkruan IAN RANDALL
Ne kemi pompuar një masë të madhe uji nga toka dhe e kemi zhvendosur diku tjetër sa që Toka është anuar “dukshëm”.
Ky është përfundimi i studiuesve që zbuluan se vetëm midis viteve 1993 dhe 2010, rishpërndarja e ujërave nëntokësore bëri që boshti rrotullues i Tokës të zhvendosej rreth 31 inç drejt lindjes.
Studimi u ndërmor nga gjeologu profesor Ki-Weon Seo i Universitetit Kombëtar të Seulit në Korenë e Jugut dhe kolegët e tij.
Siç shpjegon Prof. Seo, “poli rrotullues i Tokës në fakt ndryshon shumë”, me të ashtuquajturën “lëvizje polare” që ndodh ndërsa boshti i rrotullimit të planetit zhvendoset në lidhje me koren e Tokës.
Ai shtoi: “Studimi ynë tregon se, midis shkaqeve të lidhura me klimën, rishpërndarja e ujërave nëntokësore në fakt ka ndikimin më të madh në zhvendosjen e polit rrotullues”.
Aftësia e lëvizjeve të ujit në shkallë të gjerë për të ndryshuar boshtin rrotullues të Tokës u zbulua për herë të parë në vitin 2016 dhe u përshkrua në një punim në revistën Science Advances.
Megjithatë, deri më tani, kontributi i saktë i dhënë nga lëvizjet e ujërave nëntokësore – në krahasim, për shembull, me ndryshimet në mbulesën e akullit të Tokës – ishte i panjohur.
