Në seancën e sotme të gjykimit për zjarrin në spitalin modular të Tetovës ku humbën jetën 14 persona, u dëgjuan shtatë dëshmitarë të propozuar nga Prokuroria.
Pyetjeve të prokurorëve, gjyqtarit dhe avokatëve të të akuzuarve dhe të dëmtuarve iu përgjigjën dy mjekë, një infermiere dhe katër persona që shoqëronin pacientët në spitalin modular.
Në dëshmi, dy mjekët Mustafa Tairi dhe Shpenza Arifi Zeqiri dhe infermierja Nadire e punësuar në Spitalin Klinik kanë sqaruar se në mbrëmje ka pasur nevojë për reanimim të një pacienti, një gruaje 21-vjeçare, pas çka në spital ka shpërthyer zjarri i cili më pas edhe u përhap. Ata shpjeguan se çfarë përpjekjesh kanë bërë për të shuar zjarrin, ku dhe si kanë kërkuar ndihmë dhe si janë evakuuar pacientët.
Në pyetjen e prokurorëve dhe avokatëve se çfarë urdhrash kanë marrë mjekët nga mjeku i akuzuar Boban Vuçevski, ata kanë sqaruar se si specialist u ka dhënë udhëzime lidhur me protokollet se si të sillen me pacientët dhe çfarë terapie t’u japin, e nuk e kanë marrëndonjë urdhër tjetër prej tij. Në pyetjen e gjyqtarit nëse kishte portir në spitalin modular, dëshmitarët treguan se nuk kishte. Ata theksuan se në derën e hyrjes së spitalit modular kishte një urdhër me shkrim që vizitorët ndaloheshin të hynin, por edhe se përballeshin me persona agresivë, të cilët, përkundër kësaj, kërkonin të ishin të pranishëm në dhomat e spitalit.
