Presidenti turk, Rexhep Tajip Erdogan, ka kërcënuar se do ta godasë Athinën me raketa balistike, veprim që është dënuar nga ministri i Jashtëm grek, Nikos Dendias. Duke folur gjatë një takimi të komunës me të rinjtë në qytetin verior turk Samsun, Erdogan ka thënë se Turqia ka filluar t’i prodhojë raketat e saj balistike me rreze të shkurtra veprimi të quajtura Tayfun, të cilat, tha ai, “po i frikësonin grekët”.
“Grekët kanë thënë se mund të sulmohet Athina. Sigurisht që do të ndodhë”, ka theksuar Erdogan. “Nëse nuk qëndroni të qetë, nëse përpiqeni të blini gjëra nga Shtetet e Bashkuara dhe vende të tjera për të armatosur ishujt, një vend si Turqia duhet të bëjë diçka”.
Marrëdhëniet midis dy aleatëve të NATO-s dhe fqinjëve kanë qenë prej kohësh të tensionuara, me të dyja palët të ndara për një sërë çështjesh, duke përfshirë pretendimet territoriale në Detin Egje dhe të drejtat e eksplorimit të energjisë në Mesdheun lindor. Të dy ishin në prag të luftës tri herë në gjysmëshekullin e fundit.
