Skuqjet e lëkurës, dhimbjet e kyçeve dhe temperatura i prekin fëmijët e vegjël nëse infektohen me ‘gripin e domates’. A është vërtet një sëmundje e re? Çfarë virusi e shkakton dhe sa i rrezikshëm është? Lexoni se çfarë thonë ekspertët.
Një sëmundje e re është shfaqur prej muajsh në Kerala të Indisë. Është “gripi i domates” që sipas The Lancet Respiratory Medicine , rasti i parë u regjistrua më 6 maj.
Deri më sot, më shumë se 80 raste të sëmundjes janë raportuar në pacientët pediatrikë në pjesë të ndryshme të Indisë.
Një alarm shëndetësor është dhënë ndërkombëtarisht, ndërsa shërbimet kompetente në Evropë dhe Amerikë janë në gatishmëri.
Shumica e fëmijëve të prekur janë nën moshën pesë vjeç, me simptomat mbizotëruese : ethe, dhimbje kyçesh dhe skuqje të lëkurës . Fëmijët gjithashtu zhvillojnë flluska të kuqe dhe të dhimbshme në madhësinë e një domateje – prandaj emrin e ka marrë ‘gripi i domates’.
Fatmirësisht deri më tani nuk është raportuar asnjë rast i sëmundjes së rëndë apo vdekje dhe rastet e raportuara duket se janë duke u shëruar plotësisht.
Mjekët aktualisht nuk mund të thonë me siguri se çfarë po e shkakton këtë sëmundje të re, pasi ethet dhe algat mund t’i atribuohen shkaqeve të ndryshme. Ata spekulojnë se mund të jetë rezultat i ndonjë virusi ekzotik të transmetuar nga mushkonjat, si dengoja dhe chikungunya – apo edhe lija e dhenve.
Ata gjithashtu sugjerojnë se ndoshta skuqja e pazakontë në formë domateje që zhvillojnë fëmijët është për shkak të reagimit të tyre të ndryshëm ndaj infeksioneve pas kontraktimit të COVID-19. Gjithashtu, për shkak të përmasave të mëdha të lezioneve të lëkurës, ata spekulojnë se mund të jetë lija e majmunit.
Zgjidhja e “misterit”
Zbulimi i dy rasteve të gripit të domates tek fëmijët në Mbretërinë e Bashkuar ka ngritur një “alarm” për autoritetet shëndetësore evropiane. Pacientët e mitur shfaqën simptoma të sëmundjes pasi u kthyen nga një udhëtim familjar në Kerala, e cila besohet të jetë epiqendra e sëmundjes.
Analizat laboratorike treguan se ata ishin të infektuar me enterovirus Coxsackie A16. Virusi në fjalë shkakton të ashtuquajturën “sëmundje të dorës, këmbës, gojës”. Emri rrjedh nga flluska që pacientët shfaqin në duar (pëllëmbët), shputat e këmbëve dhe brenda zgavrës me gojë.
Prandaj, shkencëtarët argumentojnë se gripi i domates është në thelb sëmundja e duarve, këmbëve, gojës dhe nuk është një formë e re e gripit ose nuk lidhet në asnjë mënyrë me domatet dhe së fundi nuk është një sëmundje e re. Gjithashtu, nuk ka të bëjë fare me sëmundjen e Afta Epizootike në bagëti.
“ Zakonisht është e lehtë dhe pastrohet vetë brenda një jave apo më shumë. Analgjezikët mund të jenë të dobishëm ”, përfundojnë shkencëtarët.
Megjithatë, ulçera e gojës mund të vështirësojë gëlltitjen, kështu që në rastin e fëmijëve të vegjël, prindërit duhet të jenë veçanërisht të kujdesshëm për të parandaluar dehidratimin. Në raste të rralla mund ta shoqërojë sëmundje nga meningjiti viral, por deri më tani nuk është raportuar asnjë rast i sëmundjes së rëndë pas “gripit të domates”.
Ashtu si shumë sëmundje të fëmijërisë, ajo është shumë ngjitëse dhe mund të përhapet përmes lëngjeve trupore – prandaj sigurohuni që fëmijët me sëmundje të duarve, këmbëve dhe gojës të qëndrojnë jashtë aktiviteteve shkollore për të paktën pesë ditë pas shfaqjes së simptomave të para. /abcnews.al/
