Sfidat, presioni dhe pritshmëritë janë të mëdha, por është fat që kjo Qeveri ka përgjegjësinë të përballet me të gjitha këto sfida. Është lumturi sepse, me përgjegjësi pohoj se në 100 ditë kemi marrë vendime të vështira, parimore dhe mbi të gjitha shtetërore që mbrojnë qytetarët, standardin dhe të ardhurat e tyre, tha kryeministri Dimitar Kovaçevski në fjalimin e sotëm në Forumin “100 ditët e mandatit të Qeverisë së re të Republikës së Maqedonisë Veriore”, në të cilën u referua për arritjet më të rëndësishme në 100 ditët e para në kontekstin aktual vendor dhe ndërkombëtar.
Ai tha se kjo qeveri ka dëshmuar se me menaxhim të mirë, menaxhim të përgjegjshëm dhe punë të ndershme, mund të tejkalohen sfidat më të vështira. Kryeministri Kovaçevski u ndal në masat kyçe të ndërmarra nga Qeveria për zbutjen e pasojave nga kriza energjetike, si dhe prioritetet dhe masat e ndërmarra në afat të mesëm dhe afatgjatë për zhvillimin ekonomik të vendit.
Prioriteti i parë, theksoi Kovaçevski, ka të bëjë me mbrojtjen e standardit jetësor të atyre që janë më vulnerabël dhe ruajtjen e likuiditetit të kompanive. E dyta i referohet rritjes së qëndrueshme ekonomike, gjegjësisht vazhdimit të programeve për rritjen e prodhimit, eksportit, si dhe aktivitetit ekonomik në vend.
Prioriteti i tretë fokusohet në rritjen e investimeve bruto, të investimeve dominuese nga buxheti i shtetit, por edhe të investimeve private si gjenerues të rritjes ekonomike të vendit në periudhën afatmesme.
“Kjo Qeveri mbetet e përkushtuar për çështjet kyçe për qytetarët, për sigurinë ekonomike dhe standard më të mirë të jetës”, tha kryeministri Kovaçevski dhe shtoi se do të vazhdojnë të punojnë në zhvillimin ekonomik të vendit dhe mbështetjen financiare të familjeve.
“Karakteristikë e kësaj qeverie është qeverisja dhe puna efikase, e ndershme dhe e përgjegjshme dhe kjo vërehet edhe në buxhetin stabil. Edhe në kushtet e një pandemie, dhe tani në kushtet e krizës më të madhe energjetike, nuk ka vonesa në pagesën e pagave dhe pensioneve, madje financohet sektori privat dhe degët më të prekura. Paralelisht, po krijojmë plane të mëdha dhe afatgjata nga të cilat do të përfitojnë brezat aktualë dhe të ardhshëm”, përfundoi Kovaçevski.
