Lagja e Vilave në Kodrën e Diellit lë për të dëshiruar. Rruga është më gropa të shumta, ndërsa ka plot ndërtime në kundërshtimet me të gjitha standardet. Udhëheqja e kaluar e Tetovës çdo vit ka premtuar përmirësimin e infrastrukturës, por nuk është lëvizur as edhe një gurë. Premtime janë bërë edhe nga kreu i ri i Komunës.
“Pamjet e këtilla, me makina që mbeten me defekt shkaku i gropave të mëdha këtu në rrugën e vilave në Kodër të Diellit, është bërë përditshmëri. Mirëmbajtja e rrugës është më e mirë thonë banorët megjithatë, gropat assesi të sanohen”.
Këto dëmtime si dhe mungesa e mirëmbajtjes, e bëjnë edhe më të vështirë kalimin e makinave në këtë rrugë.
“Gropa ka çka duhet me u bë, duhet me u mbush me u asfaltu. Kanalizimi është për kërkundi, ndriçim pak po ama rruga është katastrofë, parking s`ka. Sa veturave u mbesin maskat në rrugë”, tha një banor.
“Sigurisht se gjithçka na duhet, këtij vendi gjithçka i duhet”, tha një banor.
“Duhej të investojnë më tepër në infrastrukturë në këtë qendër sepse vitet e bëjnë të vetën. Një kohë të gjatë asgjë nuk është bë. Sidoqoftë dimrit mirë reagojnë me rrugën e mbajnë si duhet, por duhet asfaltimi dhe kanalizimi të bëhet patjetër”, banor.
Rregullimi i kësaj rruge është premtuar pothuajse çdo vit, por asnjëherë nuk u bë. Vit më parë, madje u mor edhe kredi nga Banka Botërore për asfaltimin e rrugës në lagjen e vilave, por në moment të fundit, komuna bëri ridestinimin e fondeve. Premtime ka dhënë edhe kreu i ri i komunës së Tetovës.
“Në pranverë do kemi një plan të përgjithshëm për sanimin e gropave në qytet por sektori i veprimtarive komunale bën skanimin e gjitha rrugëve që janë problematike dhe për të cilat do kemi plan të përmirësimit jo vetëm në mbushjen e gropave por edhe ndërrimin e komplet shtresës së asfaltit me shtresë të re, dhe në këtë plan gjithsesi se do jetë e përfshirë edhe lagja e vikend shtëpizave”, tha Bilall Kasami, Kryetar i komunës së Tetovës.
Rruga nuk është problemi i vetëm në Lagjen e Vilave, por edhe ndërtimet vend e pa vend dhe jashtë çdo standardi. Janë ndërtuar pallate me nga dy apo tre kate, në vend të vilave, të cilat, sipas rregullores, duhet të bëhen me gurë dhe dru. /Alsat.mk
https://youtu.be/CSPfQvV4Zaw
