Një parcelë 200 hektarëshe në Gllogjan të Deçanit ka bërë që të replikojnë kryeministri Albin Kurti dhe kryetari i AAK-së, Ramush Haradinaj.
Kurti i ka propozuar Haradinajt që këtë tokë t’ia kthejë shtetit të Kosovës për çmimin e blerë.
“Kërkesat për rritje rroge të zjarrfikësve janë lot krokodili. Meqë u propozua që t’i dërgojë ministrat te KEK-u për t’u mërdhirë, atëherë unë e kam një kundërpropozim: Haradinaj t’ia kthejë shtetit 200 hektarët dhe në ia japim 70 mijë euro”, është shprehur Kurti.
Në anën tjetër, Haradinaj ka thënë se ka riblerë tokën që ishte pronë e familjes së tij.
“Kurti po fshihet prej pazotësisë dhe po thotë se kam blerë 200 hektarë tokë. Po, i kam blerë me ligje të Kosovës, e kam shfrytëzuar të drejtën ligjore. E kam riblerë tokën e babait tim dhe katundit tim, e cila ndodhet në Gllogjan”.
