Hoxhaj mbyll fushatën: PDK-ja është qartësia, VV-ja është mjegulla
Kryetari i Partisë Demokratike të Kosovës, njëherësh kandidati për kryeministër, Enver Hoxhaj ka përmbyllur fushatën zgjedhore për zgjedhjet e jashtëzakonshme në një tubim elektoral në Prishtinë ku ka thënë se më 14 shkurt do të shkruhet një faqe e re në historinë e Kosovës. Edhe në tubimin përmbyllës, Hoxhaj është marrë me Lëvizjen Vetëvendosje të cilën e ka quajtur “mjegull”.
Ai ka shtuar që pas shkuarjes në Hagë të dy liderëve të UÇK-së, Hashim Thaçi dhe Kadri Veseli “PDK-ja nuk është dorëzuar, por është bërë edhe më e fortë”.
“Së shpejti do të kthehen heronjtë tonë. Të pafajshëm! Dhe së bashku me ta, edhe historia e Kosovës do të dalë e pafajshme. Ne bëjmë Historinë në luftë dhe në paqe. Ne nuk e fshijmë historinë siç bën Vetëvendosje. Vetëvendosje po fshin historinë e saj duke hequr të gjitha ato që kanë thënë dhe bërë deri në vitin 2014. LVV është Mjegulla! PDK është Qartësia! Ne jemi qartësia dhe drita e re. Drita që do ta Rimëkëmbë Kosovën! Gjithçka e lidhur me ne është në dritë”, ka thënë Hoxhaj. “Vetëvendosje është mjegulla. Ata i fshehin qëllimet e tyre. Ata e fshehin programin e tyre. Ata fshehin historinë e tyre. Ata fshihen! Vetëvendosje është e rrezikshme. Sepse e panjohura është e rrezikshme. Sepse mjegulla është e rrezikshme. Ne nuk do të lejojmë që Albin Kurti të marrë pushtetin. Ne nuk do të lejojmë që Kosova të rrëshqasë në ujëra të panjohura. Ne do ta ndalim atë. PDK do ta ndalë atë! Të gjithë ne së bashku do ta ndalim atë”.
Hoxhaj ka shtuar se nëse fiton në zgjedhje, pas tyre do të nisë me “rimëkëmbjen e Kosovës”.
