Deputeti i LVV-së, Mefail Bajqinovci në një postim në Facebook i ka reaguar kryetarit të LDK-së, Isa Mustafës, pasi ky i fundit tha se “pa hezitim do ta pranojnë mandatin për formimin e Qeverisë”.
Bajqinovci ia përmend Mustafës shkeljet kushtetuese që i ka bërë, që nga rrëzimi nga kryetari i Kuvendit e deri në nënshkrimi për Asociacionin e Komunave Serbe.
Ai thotë se urdhrat e Isa Mustafës janë shenjat me vetulla të Hashim Thaçit.
“Shihemi në zgjedhje se zgjedhjet janë demokracia e pushteti duhet të ketë rrënjët në vullnetin popullor”, ka thënë ndër tjera Bajqinovci.
Postim i plotë:
Isa Mustafa, paska deklaruar se “pa hezitim do ta pranojnë mandatin për formimin e Qeverisë”. Madje i paska përmendur “bazat kushtetuese”. E po ky kështu pa hezitim dhe me “bazat e tij kushtetuese” e kishte pranuar njëherë edhe pozitën e kryetarit të Kuvendit por ishte rrëzuar nga aty. Ky pa asnjë hezitim e kishte nënshkruar edhe Marrëveshjen për Asociacionin e Komunave me Shumicë Serbe duke i dhënë kompetenca që shkilnin 23 nene të Kushtetutës. Edhe kësaj here kishte vepruar me “bazat e tij kushtetuese”.
E po tashmë secili qytetar në këtë vend e di se për Isa Mustafën “baza kushtetuese” janë urdhërat e shenjat me vetulla të Hashim Thaçit.
Menjëherë pas Isës doli shefi i Ises duke treguar se si po bëhen hapa drejt grabitjes së vullnetit të popullit javën tjetër.
Isë dhe Hashim, Kosova nuk mund të lejojë zhvlerësimin e rregullave kushtetuese të cilat i normojnë procedurat për funksionimin e demokracisë. Këtyre tashmë nuk i bën as për demokracinë as për Kushtetutë e as për shtetin. Isa dëshiron pushtetin me Hashimin edhe nëse kjo kalon nëpër nxjerrjen e demokracisë e kushtetutshmërisë në rrugë të anarkisë kushtetuese. Isë, je duke e zhveshur LDK’ne nga çdo vlerë burimore. Duhet të kuptoni ju dy se idea për Kushtetutë në Evropën perëndimore ka kaluar përmes kundërthëniesh politike e shoqërore të shumta sepse ajo, themelsisht është akt i kufizimit të pushtetit e palëve nga arbitrarizmi.
Kosova është mbi të gjitha. Shihemi në zgjedhje se zgjedhjet janë demokracia e pushteti duhet të ketë rrënjët në vullnetin popullor.
