Një grua e moshës 86 vjeçare në Kosovë e ka mposhtur coronavirusin, shkruan reporteri.net.
Lajmin e ka bërë të ditur i biri i saj, Rasim Preniqi në rrjetin social Facebook.
Preniqi ka shkruar se nëna e tij e ka mposhtur virusin duke u trajtuar në shtëpi.
“Nëna ime 86 vjeçare e mposhti coronavirusin në shërim shtëpiak. Një falënderim të posaçëm për shërimin e saj i takon Qendrës Familjare të Shëndetit në Obiliq në krye me doktor Haki Jasharin dhe stafin e tij. Për interesim dhe kujdes të shtuar e falënderoj pneumologun Skënder Baca. Ajo tani është plotësisht e shëruar”, ka shkruar Preniqi.
Kosova aktualisht po kalon situatë të rënduar me Covid-19. Kështu thonë autoritetet përgjegjëse derisa numri i viktimave dhe rasteve të reja po rritet çdo ditë.
Deri sot, në vendin tonë, sipas Institutit Kombëtar të Shëndetit Publik të Kosovës janë konfirmuar 7.137 raste me Covid-19, derisa 3.086 prej tyre vazhdojnë të jenë aktive. Vetëm sot u konfirmuan 220 raste të reja.
Ndërkohë tetë të infektuar vdiqën 24 orët e fundit duke e çuar në 177 numrin e atyre që humbën jetën nga koronavirusi në vendin tonë.
