Kryetari i Aleancës për Ardhmërinë e Kosovës, Ramush Haradinaj ka folur për vendosjen e reciprocitetit me Serbinë për targat, duke thënë se veprimet e sotme janë vazhdim i dakordimeve të mëhershme dhe se nuk duhet të ketë kthim prapa.
Ai ka thënë se Qeveria Kurti është treguar mjaft e kujdesshme në marrëdhëniet me Serbinë.
“Janë shumë dëshmi që flasin se Qeveria Kurti ka qenë e mirëkuptueshme ndaj Serbisë. Veçanërisht ky mirëkuptim e ka mbërri kulmin te pagesa e rrymës dy herë nga 11 milionë janë shuma të mëdha. Mendoj se i ka përkëdhel me kujdes edhe serbët e veriut edhe Serbinë ndërsa veprimet e sotme janë pasojë e dakordimeve të mëhershme, pra nuk janë rezultat i ri, por pasojë, vazhdim i dakordimeve të mëhershme. Kjo ka qenë e pritur se do të ndodhë”, tha Haradinaj.
Ai ka theksuar se masa e reciprocitetit ka ardhur si pasojë e dështimit të procesit të dialogut në Bruksel.
